نيولوك جديد لبيتك بإيدك وبأبسط التكاليف




قاعدة في البيت وعمالة تبصي حواليك شمال ويمين
وحاسة إن البيت محتاج تغيير كامل شامل
لأن منظره بقى ممل أوي
بس بعد ما قعدتي مع نفسك وحسبتيها لقيتي إن الميزانية مش هتساعدك تعملي كل اللي نفسك فيه
طبعا زعلتي جدا لأنك كان نفسك تغيري وتجددي
استايل بيتك خصوصا مع بداية 2009
ولأننا مش معقول نلاقيكي قاعدة زعلانة ونقف نتفرج
عملنا لك العدد غير العادي ده
وتعالي نعمل مع بعض نيولوك جديد للبيت
في الأول يا قمر عايزين نتفق مع بعض على إننا هنجدد البيت بأقل التكاليف الممكنة وده علشان نضرب أكتر من عصفور بحجر واحد نغير من ديكورات البيت علشان نقضي على حالة الملل والرتابة اللي بنحس بيها من تكرار رؤية نفس المناظر بصفة مستمرة... وفي نفس الوقت نوفر فلوسنا.. متفقين على المبدأ؟ طبعا متفقين. 
بما إننا متفقين على المبدأ يبقى تعالي نمشي مع بعض واحدة واحدة ونعرف إزاي......
بالنسبة ل "الليفنج روم"


دي أول حاجة هنبدتي بيها وده لأن "الليفنج روم" دي هي اللي الإنسان بيقعد فيها وقت طويل سواء علشان يتفرج على التليفزيون أو علشان أفراد الأسرة كلهم يقعدوا مع بعض ويتكلموا في أي موضوعات تهم الأسرة...
ودي تجديدها هيكون من خلال إضافة لمسات بسيطة زي مثلا تغيير الفازة الموجوة في الليفنج بفازة تانية جديدة مش كده وبس ده أنت كمان ممكن تغيري نوع الورد الصناعي اللي بتحطيه في الفازة دي، ولأن ستارة الليفنج عادة تمنها بيكون بسيط فممكن تجيبي واحدة جديدة بحيث إنك تغيري فيها هي والقديمة من وقت للتاني، كمان ممكن تجيبي مفارش جديدة وتحطيها على الأنتريه نفسه بشكل عشوائي أو تحطي مفرش جديد على ترابيزة الأنتريه...


وممكن تشتري مخدات صغيرة ودي موجودة في الأسواق بأسعار بسيطة جدا، وتحطيها على الأنتريه أو تحطيها بشكل عشوائي على الأرض بجانب الأنتريه أو بجانب ترابيزة الأنتريه لكن لو كانت المخدات دي عندك يبقى ممكن تجدديها بنفسك بإنك تجيبي قماش جديد وتقصيه على مقاسها وتخيطيه فيها وبعد كده ممكن تجمليها بالخرز أو بمجموعة من الزراير..


ولو كان الليفنج بتاعك فيه مكتبة ممكن تجيبي بعض قطع الإكسسوار البسيطة الصغيرة الموجودة في الأسواق بأسعار بسيطة وتحطيها في المكتبة ولو كانت الإكسسوارات دي موجودة عندك فعلا يبقى ممكن تبدلي مكان كل قطعة بقطعة أخرى. كمان ممكن تعيدي ترتيب المكتبة بشكل جديد أو تغيري مفارش المكتبة بمفارش تانية جديدة...

فيه فكرة كمان ممكن تجددي بيها غرفة الليفنج وهي إنك تغيري أماكن الأثاث الموجود في الغرفة يعني تجيبي كرسيين الأنتريه مكان كنبة الأنتريه والعكس طبعا بالإضافة إلى إنك ممكن تستعيني ببعض من الأشجار والنباتات الصناعية لتجديد غرفة الليفنج أو ممكن تحطي تابلوه جديد على الحيطة أو تحطي أباجورة جديدة في الليفنج.
بالنسبة لغرفة السفرة 


فدي ممكن تجددي فيها عن طريق إنك تغيري مفرش السفرة أو تغيري الفازة اللي بتحطي فيها الورد على السفرة أو تغيري لون الورد الموجود في الفازة دي بورد تاني.. كمان ممكن تجيبي شالات شيفون بعدد كراسي السفرة مع مراعاة إن لونهم يكون واحد ويكون في نفس الوقت لونهم مناسب للون مفرش السفرة وتربطي كل شال في ظهر كل كرسي من الكراسي دي...


كمان ممكن تجيبي نباتات زينة أو نباتات صناعية كبيرة وتحطيها في الغرفة لكن لو كانت النباتات دي عندك فعلا يبقى ممكن تغيري أماكنهم، كمان ممكن تغيري من ترتيب أثاث غرفة السفرة على سبيل التجديد؛ ده طبعا في حالة لو كانت المساحة عندك تسمح بكده...
لكن لو كان قماش تنجيد كراسي السفرة عندك لونه باهت أو فيه بقع وشكله قديم ممكن تجيبي قماش تاني حوالي متر قماش لكل كرسي وتثبتيه بالمسامير على الكرسي...



ومن الأفكار اللي ممكن تعمليها علشان تجديد شكل غرفة السفرة إنك تغيري مكان النيش، ده طبعا لو كان عندك مساحة تسمح بكده كمان ممكن تغيري المفارش الموجودة عندك في النيش أو تغيري من ترتيب أماكن الحاجات الموجودة داخل النيش مع الاستعانة ببعض من قطع الإكسسوار البسيطة اللي بتدي شكل حلو في النهاية.
بالنسبة لغرف النوم




فيه أكتر من طريقة هتساعدك على تجديد شكل غرفة نومك زي إنك تحطي تابلوهين على شكل مناظر طبيعية بجوار شباك السرير.. أو ممكن تغيري ستارة أوضة النوم برضه على سبيل التجديد أو تغيري من أماكن الأثاث داخل غرفة النوم يعني تجيبي الدولاب مكان السرير والسرير مكان الدولاب وده طبعا هيتوقف على حسب مساحة الغرفة عندك...


ومن الحاجات اللي ممكن تعمليها علشان تغيري شكل الغرفة إنك تغيري الأباجورات الموجودة عندك في غرفة النوم، أو تغيري لون اللمبة بتاعة الأباجورات الموجودة على سبيل التجديد...كمان ممكن تحطي مفارش جديدة على السرير... أو تحطي بعض الإكسسوارات أو فازات الورد أو التابلوهات الصغيرة وتحطيهم على التسريحة.
بالنسبة للمطبخ 


برضه ممكن تجددي المطبخ بتاعك عن طريق إنك تحطي نباتات زينة أو نباتات صناعية في المطبخ، ولو كانت مساحة المطبخ عندك كبيرة ممكن تجيبي ترابيزة "فيرفورجيه" حديد و3 كراسي وتحطيهم في المطبخ بيدوا شكل حلو وكمان مش بياخدوا مساحة كبيرة في المطبخ..

كمان ممكن تجيبي شوية إكسسوارات خاصة بالمطبخ وتعلقيها على الحيطة زي السلال الحديثة اللي بتوضع فيها الأدوات والخضروات والفواكه 

بالإضافة إلى إنك ممكن تغيري غطاء مفاتيح الكهرباء الموجودة في المطبخ وتحطي بعض الإكسسوارات البسيطة على التلاجة وطبعا مش محتاجة أقولك إن نظافة المطبخ أول بأول دي أهم حاجة وفعلا الحاجة الوحيدة اللي بتجدد مطبخك باستمرار. 
بالنسبة للحمام

أهم حاجة إنك تحافظي على نظافة الحمام أولا بأول، وإنه يكون جاف باستمرار ومعطر مش كده وبس ده ممكن تحطي فيه بعض الحاجات البسيطة زي مثلا حوض زرع صناعي يكون شفاف وفيه شوية قواقع أو أحجار كمان ممكن تغيري ستارة الحمام أو تغيري الدواسات الموجودة عندك في الحمام كمان لو كانت الغسالة موجودة عندك في الحمام ممكن تجيبي لها حافظة جديدة كل فترة.


وممكن تغيري الإكسسوارات الموجودة في الحمام زي مثلا علب الصابون وفرش الأسنان والشامبو وممكن تجيبي سبت غسيل جديد، يكون من الخوص وتحطي فيه الهدوم اللي محتاجة غسيل.
بالنسبة لمدخل الشقة

فده ممكن تجدديه عن طريق إنك تحطي تابلوه في مدخل الشقة أو ساعة كبيرة، وتحطي سجادة جديدة ومرايا كبيرة ولو كانت المرايا دي موجودة ممكن تغيري إطارها.
وبكده يكون خلص كلامنا النهارده

ودلوقتي يلا بسرعة قومي جددي بيتك بنفسك 
ولو جت لك فكرة تانية جديدة وهتعمليها ياريت تقوليلنا عليها 




تعليقات

المشاركات الشائعة من هذه المدونة

نزهة عائلية إلى عالم المغامرات IMG

ما أهمية الحضور على الإنترنت بالنسبة لشركتك؟

The Empowering Internet Safety Guide for Women